பெரும் அசம்பாவிதம் தவிர்ப்பு...! கட்டுப்பாட்டை இழந்த தனியார் பேருந்து..! 10 பேர் காயம்..!

by Vignesh Perumal on | 2026-04-07 01:28 PM

Share:

பெரும் அசம்பாவிதம் தவிர்ப்பு...! கட்டுப்பாட்டை இழந்த தனியார் பேருந்து..! 10 பேர் காயம்..!

திருநெல்வேலியில் இருந்து தூத்துக்குடி நோக்கிச் சென்ற தனியார் பேருந்து, ஓட்டுநரின் கட்டுப்பாட்டை இழந்து சாலைக்கு அருகே இருந்த தரிசு நிலத்தில் பாய்ந்து விபத்துக்குள்ளான சம்பவம் பரபரப்பை ஏற்படுத்தியுள்ளது.

திருநெல்வேலி மற்றும் தூத்துக்குடி இடையே இயக்கப்படும் தனியார் பேருந்து ஒன்று இன்று காலை எதிர்பாராத விதமாக விபத்துக்குள்ளானது. அதிர்ஷ்டவசமாகப் பெரும் உயிர்ச் சேதம் தவிர்க்கப்பட்டுள்ளது.

திருநெல்வேலி புதிய பேருந்து நிலையத்திலிருந்து தூத்துக்குடி நோக்கிப் பேருந்து சென்று கொண்டிருந்தது. திருநெல்வேலி - தூத்துக்குடி தேசிய நெடுஞ்சாலையில், வாகைகுளம் அருகே பேருந்து வந்தபோது இந்த விபத்து நிகழ்ந்துள்ளது.

பேருந்து அதிவேகமாகச் சென்று கொண்டிருந்தபோது, திடீரென ஓட்டுநரின் கட்டுப்பாட்டை இழந்தது. சாலை ஓரத்தில் இருந்த தடுப்புகளைத் தாண்டி, அருகில் இருந்த தரிசு நிலத்திற்குள் பேருந்து பாய்ந்தது.

கட்டுப்பாட்டை இழந்த பேருந்து, கரடுமுரடான அந்தத் தரிசு நிலத்தில் சுமார் 200 மீட்டர் தூரம் ஓடி, பின்னர் ஒரு பள்ளத்தில் இறங்கி நின்றது.

விபத்தின் போது பேருந்திற்குள் இருந்த பயணிகள் அலறினர். இந்த விபத்தில் பேருந்தின் முன்பக்கக் கண்ணாடி மற்றும் ஜன்னல்கள் உடைந்தன. பேருந்தில் பயணம் செய்தவர்களில் 10-க்கும் மேற்பட்டோர் லேசானது முதல் பலத்த காயமடைந்தனர்.

அக்கம் பக்கத்தினர் மற்றும் அவ்வழியாகச் சென்ற வாகன ஓட்டிகள் உடனடியாக மீட்புப் பணியில் ஈடுபட்டனர். காயமடைந்தவர்கள் ஆம்புலன்ஸ் மூலம் திருநெல்வேலி அரசு மருத்துவக் கல்லூரி மருத்துவமனை மற்றும் தூத்துக்குடி அரசு மருத்துவமனைக்குச் சிகிச்சைக்காக அனுப்பி வைக்கப்பட்டனர்.

சம்பவ இடத்திற்கு வந்த போலீஸார், விபத்துக்குள்ளான பேருந்தை அப்புறப்படுத்தும் பணியில் ஈடுபட்டனர். மேலும், விபத்து குறித்து வழக்குப் பதிவு செய்து, ஓட்டுநரிடம் விசாரணை நடத்தி வருகின்றனர்.

தேசிய நெடுஞ்சாலையில் நடந்த இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது. பயணிகள் அனைவரும் மாற்றுப் பேருந்துகள் மூலம் அனுப்பி வைக்கப்பட்டனர்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now