இன்று வாக்குப்பதிவு...! பலத்த போலீஸ் பாதுகாப்பு...!

by Vignesh Perumal on | 2026-04-15 06:23 PM

Share:

இன்று வாக்குப்பதிவு...! பலத்த போலீஸ் பாதுகாப்பு...!

தமிழ்நாடு சட்டமன்றத் தேர்தல் பணிகளில் ஈடுபடும் அரசு ஊழியர்கள் மற்றும் ஆசிரியர்களிடமிருந்து தபால் வாக்குகளைப் பெறும் பணி இன்று (ஏப்ரல் 15, 2026) முதல் அதிகாரப்பூர்வமாகத் தொடங்கியுள்ளது.

தமிழகத்தில் வரும் ஏப்ரல் 23-ஆம் தேதி சட்டமன்றத் தேர்தல் நடைபெற உள்ளது. இதையொட்டி, தேர்தல் நடத்தும் அலுவலர்கள், ஆசிரியர்கள் மற்றும் அரசு ஊழியர்களுக்கு இன்று இரண்டாம் கட்டப் பயிற்சிகள் பல்வேறு மையங்களில் நடைபெறுகின்றன.

தேர்தல் பணிகளில் ஈடுபடுவோர் தங்கள் வாக்குகளைச் செலுத்த வசதியாக, அவர்கள் பயிற்சி பெறும் இடங்களிலேயே தபால் வாக்குப்பதிவு மையங்கள் அமைக்கப்பட்டுள்ளன.

வாக்குச்சாவடி நிலை அலுவலர்கள் (BLO), ஆசிரியர்கள் மற்றும் இதர துறை அரசுப் பணியாளர்கள் இன்று இந்தப் பயிற்சி மையங்களில் தங்கள் தபால் வாக்குகளைப் பதிவு செய்யலாம்.

வாக்குப்பதிவு மையங்களில் ரகசியமாக வாக்களிக்கத் தனி அறைகள் ஒதுக்கப்பட்டுள்ளன. வாக்களித்த பின், சீல் வைக்கப்பட்ட பெட்டிகளில் அவற்றைச் சமர்ப்பிக்க வேண்டும்.

ஒவ்வொரு மாவட்டத்திலும் அந்தந்த மாவட்டத் தேர்தல் அதிகாரிகளான ஆட்சியர்கள் தலைமையில் இதற்கான சிறப்பு ஏற்பாடுகள் செய்யப்பட்டுள்ளன.

மாவட்டத்தில் உள்ள 10 சட்டமன்றத் தொகுதிகளுக்கும் தலா ஒரு பயிற்சி மையம் வீதம் அமைக்கப்பட்டு, அங்கேயே தபால் வாக்கு வசதி செய்யப்பட்டுள்ளது.

திருச்சி மாவட்டத்தில் உள்ள 9 தொகுதிகளில் இன்று ஆசிரியர்கள் மற்றும் ஊழியர்கள் வாக்குப்பதிவு செய்கின்றனர். இன்று தவற விடுபவர்களுக்கு ஏப்ரல் 19-ஆம் தேதி நடைபெறும் அடுத்தகட்டப் பயிற்சியின் போது ஒரு வாய்ப்பு வழங்கப்படும்.

சென்னையில் உள்ள 16 தொகுதிகளிலும் இன்று ஊழியர்களுக்கான தபால் வாக்குப்பதிவு விறுவிறுப்பாகத் தொடங்கியுள்ளது.

85 வயதுக்கு மேற்பட்டவர்கள் மற்றும் மாற்றுத்திறனாளிகளுக்கு அவர்கள் வீட்டிற்கே சென்று வாக்கு சேகரிக்கும் பணி பல மாவட்டங்களில் ஏற்கனவே தொடங்கி நடைபெற்று வருகிறது (குறிப்பாக ஏப்ரல் 16-18 தேதிகளில் சென்னையில் நடைபெற உள்ளது).

தேர்தல் பாதுகாப்புப் பணியில் ஈடுபடும் போலீசார் மற்றும் ஊர்க்காவல் படையினருக்கு வரும் ஏப்ரல் 17, 18 மற்றும் 19 ஆகிய தேதிகளில் தபால் வாக்குப்பதிவு நடைபெற உள்ளது.

மின்சாரம், போக்குவரத்து, தீயணைப்பு மற்றும் ஊடகத்துறையினர் அந்தந்த தேர்தல் நடத்தும் அலுவலர் அலுவலகங்களில் குறிப்பிட்ட தேதிகளில் வாக்களிக்கலாம்.

பதிவு செய்யப்பட்ட அனைத்து தபால் வாக்குகளும் பலத்த பாதுகாப்புடன் அந்தந்த தொகுதி வாக்கு எண்ணும் மையங்களில் உள்ள காப்பு அறைகளில் வைக்கப்படும். இவை அனைத்தும் வாக்கு எண்ணும் நாளான மே 4-ஆம் தேதி காலை 8 மணிக்கு முதலில் எண்ணப்படும் என்பது குறிப்பிடத்தக்கது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now