பள்ளிவாசல் செயலாளருக்கு அரிவாள் வெட்டு ! முன்னாள் நிர்வாகி கைது !!!

by satheesh on | 2026-02-18 01:07 PM

Share:

பள்ளிவாசல் செயலாளருக்கு அரிவாள் வெட்டு ! முன்னாள் நிர்வாகி கைது !!!

உடன்குடியில் முன்விரோதம் காரணமாகப் பள்ளிவாசல் செயலாளரைச் சரமாரியாக அரிவாளால் வெட்டிய முன்னாள் நிர்வாகியைப் போலீசார் கைது செய்துள்ளனர்.

தூத்துக்குடி : உடன்குடி முகைதீன் புதுத்தெருவைச் சேர்ந்தவர் அப்துல்சலாம் (70). இவர் அப்பகுதியில் உள்ள பள்ளிவாசலில் செயலாளராகப் பணியாற்றி வருகிறார். இதே பள்ளிவாசலில் சபியுல்லா (63) என்பவர் முன்பு துணைத் தலைவராக இருந்துள்ளார். அப்துல்சலாமுக்கும் சபியுல்லாவுக்கும் இடையே நீண்டகாலமாகத் தொழில் ரீதியாகவோ அல்லது நிர்வாக ரீதியாகவோ கருத்து வேறுபாடு நிலவி வந்ததாகக் கூறப்படுகிறது. சபியுல்லா சில ஆண்டுகளுக்கு முன்பு தனது பதவியிலிருந்து விலகிய போதிலும், இருவருக்கும் இடையே முன்விரோதம் தொடர்ந்து வந்துள்ளது. சம்பவத்தன்று மதியம் அப்துல்சலாம் வீட்டிற்குத் தேவையான மீன் மற்றும் பொருட்களை வாங்குவதற்காகப் பஜாருக்குச் சென்றுள்ளார். அப்போது தனது பக்கத்து வீட்டுக்காரருக்காகவும் மீன் வாங்கிய அவர், அதனை அவரிடம் கொடுப்பதற்காகச் சென்றுள்ளார். அந்த நேரத்தில் அங்கு வந்த சபியுல்லா, திடீரென அப்துல்சலாமிடம் தகராறில் ஈடுபட்டு அவரை அவதூறாகப் பேசியுள்ளார். ஆத்திரமடைந்த சபியுல்லா, தான் மறைத்து வைத்திருந்த அரிவாளால் அப்துல்சலாமைச் சரமாரியாக வெட்டினார். இதில் தலை மற்றும் கை பகுதிகளில் பலத்த காயமடைந்த அப்துல்சலாம் ரத்த வெள்ளத்தில் அலறியவாறு தெருவில் விழுந்தார். அவரது அலறல் சத்தம் கேட்டு அக்கம் பக்கத்தினர் ஓடி வருவதைக் கண்ட சபியுல்லா அங்கிருந்து தப்பி ஓடிவிட்டார். படுகாயமடைந்த அப்துல்சலாமை மீட்ட பொதுமக்கள், அவரை சிகிச்சைக்காக உடன்குடி அரசு மருத்துவமனைக்கு அனுப்பி வைத்தனர். அங்கு அவருக்குத் தீவிர சிகிச்சை அளிக்கப்பட்டு வருகிறது. இச்சம்பவம் குறித்து குலசேகரன்பட்டினம் போலீசார் வழக்குப் பதிவு செய்து விசாரணை நடத்தினர். தலைமறைவாக இருந்த சபியுல்லாவைப் போலீசார் விரைந்து கைது செய்தனர். மக்கள் நடமாட்டம் மிகுந்த பகுதியில் பள்ளிவாசல் நிர்வாகி வெட்டப்பட்ட சம்பவம் உடன்குடி பகுதியில் பெரும் பரபரப்பை ஏற்படுத்தியுள்ளது.

இணை ஆசிரியர் ; N. சதீஷ்குமார், பெரியகுளம். தேனி.

WhatsApp Group Join Now