சீமானுக்குக் கொலை மிரட்டல்...! தேனி மாவட்டச் செயலாளர் மீது அதிரடி வழக்குப்பதிவு...!

by Vignesh Perumal on | 2026-01-25 03:42 PM

Share:

சீமானுக்குக் கொலை மிரட்டல்...! தேனி மாவட்டச் செயலாளர் மீது அதிரடி வழக்குப்பதிவு...!

நாம் தமிழர் கட்சியின் தலைமை ஒருங்கிணைப்பாளர் சீமான் மற்றும் அக்கட்சியின் முக்கிய நிர்வாகி சாட்டை துரைமுருகன் ஆகியோரை ஆபாசமாகப் பேசி, கொலை மிரட்டல் விடுத்ததாகத் தமிழக வெற்றிக் கழகத்தின் தேனி தெற்கு மாவட்டச் செயலாளர் லெப்ட் பாண்டி மீது தேனி நகர போலீசார் வழக்குப்பதிவு செய்துள்ளனர்.

கடந்த சில நாட்களாகச் சமூக வலைதளங்களில் நாம் தமிழர் கட்சி மற்றும் தமிழக வெற்றிக் கழக நிர்வாகிகள் இடையே கடுமையான கருத்து மோதல்கள் நிலவி வருகின்றன. குறிப்பாக, சீமானின் சில அரசியல் விமர்சனங்களுக்குத் தவெக தரப்பினர் பதிலடி கொடுத்து வருகின்றனர்.

இந்தச் சூழலில், தேனி தெற்கு மாவட்டத் தவெக செயலாளரான லெப்ட் பாண்டி ஒரு வீடியோவை வெளியிட்டுள்ளார். அதில், நாம் தமிழர் கட்சி ஒருங்கிணைப்பாளர் சீமான் மற்றும் சாட்டை துரைமுருகன் ஆகியோரை மிகக் கேவலமான வார்த்தைகளால் ஆபாசமாகத் திட்டியதாகக் கூறப்படுகிறது.

மேலும், அவர்களுக்கு நேரடியான கொலை மிரட்டல் விடுத்ததாகவும் அந்த வீடியோவில் பதிவாகியிருந்தது.

இந்த வீடியோ சமூக வலைதளங்களில் பரவி பெரும் சர்ச்சையை ஏற்படுத்திய நிலையில், நாம் தமிழர் கட்சியின் தேனி மாவட்டச் செயலாளர் மற்றும் நிர்வாகிகள் தேனி நகர காவல் நிலையத்தில் இது குறித்துப் புகார் அளித்தனர். அந்தப் புகாரில், "பொது அமைதிக்குக் குந்தகம் விளைவிக்கும் வகையிலும், ஒரு கட்சியின் தலைவருக்குக் கொலை மிரட்டல் விடுத்த லெப்ட் பாண்டி மீது கடும் நடவடிக்கை எடுக்க வேண்டும்" என வலியுறுத்தப்பட்டது.

புகாரைப் பரிசீலித்த தேனி நகர போலீசார், தவெக நிர்வாகி லெப்ட் பாண்டி மீது வழக்குப்பதிவு செய்துள்ளனர்.

தற்போது அவர் மீது வழக்குப்பதிவு செய்யப்பட்டு விசாரணை நடைபெற்று வருகிறது. இதனால் எந்த நேரத்திலும் அவர் கைது செய்யப்படலாம் என எதிர்பார்க்கப்படுகிறது.

2026 சட்டமன்றத் தேர்தலை முன்னிட்டுத் தமிழக வெற்றிக் கழகம் களமிறங்கியுள்ள நிலையில், ஏற்கனவே களத்தில் உள்ள நாம் தமிழர் கட்சிக்கும் தவெக-விற்கும் இடையே 'வாக்கு வங்கி' அரசியல் போட்டி எழுந்துள்ளது. சீமான் சமீபகாலமாக விஜய்யின் அரசியல் நகர்வுகளை விமர்சித்து வருவது தவெக தொண்டர்களிடையே கொந்தளிப்பை ஏற்படுத்தியுள்ளது. அதன் வெளிப்பாடாகவே இந்த மிரட்டல் வீடியோ பார்க்கப்படுகிறது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now