அமமுகவுக்குப் பேரிடி..! 3 மாவட்டச் செயலாளர்களுடன்...! முதல்வர் முன்னிலையில் சம்பவம்..!

by Vignesh Perumal on | 2026-01-23 10:37 AM

Share:

அமமுகவுக்குப் பேரிடி..! 3 மாவட்டச் செயலாளர்களுடன்...! முதல்வர் முன்னிலையில் சம்பவம்..!

ஆளும் கட்சியான திமுக தனது பலத்தைப் பெருக்கும் வகையில் எதிர்க்கட்சிகளின் முக்கிய நிர்வாகிகளை ஈர்த்து வருகிறது. இதன் ஒரு பகுதியாக, இன்று (ஜனவரி 23, 2026) காலை சென்னை அண்ணா அறிவாலயத்தில் நடைபெற்ற நிகழ்வில், அமமுகவின் தென் மண்டல அமைப்பாளர் மாணிக்கராஜா முதல்வர் மு.க. ஸ்டாலின் முன்னிலையில் திமுகவில் ஐக்கியமானார்.

மாணிக்கராஜாவுடன் சேர்த்து அமமுகவின் வலுவான கோட்டையாகக் கருதப்படும் தென் மாவட்டங்களைச் சேர்ந்த 3 மாவட்டச் செயலாளர்கள் மற்றும் நூற்றுக்கணக்கான நிர்வாகிகள் திமுகவில் இணைந்தனர். அவர்களுக்கு முதல்வர் மு.க. ஸ்டாலின் மற்றும் துணை முதல்வர் உதயநிதி ஸ்டாலின் ஆகியோர் பொன்னாடை போர்த்தி வரவேற்பு அளித்தனர்.

தூத்துக்குடி மாவட்டம் கடம்பூர் ஜமீன் குடும்பத்தைச் சேர்ந்த இவர், அப்பகுதியில் பெரும் சமூக மற்றும் அரசியல் செல்வாக்கு கொண்டவர்.

அமமுக தொடங்கப்பட்ட காலத்திலிருந்தே டி.டி.வி. தினகரனின் நம்பிக்கைக்குரிய தளபதியாகச் செயல்பட்டு வந்தார். கட்சியின் தேர்தல் பிரிவு செயலாளர் மற்றும் தென் மண்டல அமைப்பாளர் எனப் பல உயர்மட்டப் பொறுப்புகளை வகித்தவர்.

இவர் திமுகவில் இணையப் போவதாகத் தகவல் வெளியான சில மணி நேரங்களுக்கு முன், "கட்சியின் கட்டுப்பாட்டை மீறியதாகக்" கூறி டி.டி.வி. தினகரனால் இவர் அடிப்படை உறுப்பினர் பதவியிலிருந்து நீக்கப்பட்டார்.

இணைப்பு விழாவிற்குப் பின் செய்தியாளர்களிடம் பேசிய மாணிக்கராஜா: "தமிழகத்தில் கடந்த 5 ஆண்டுகளாக நடைபெற்று வரும் 'திராவிட மாடல்' ஆட்சியின் சாதனைகளும், முதல்வர் ஸ்டாலினின் மக்கள் நலப் பணிகளும் என்னைக் கவர்ந்துள்ளன. 2026 சட்டமன்றத் தேர்தலில் திமுக மீண்டும் மகத்தான வெற்றி பெறவும், தென் மாவட்டங்களில் கட்சியின் வெற்றியை உறுதி செய்யவும் உழைப்பேன்" எனத் தெரிவித்தார்.

தென் மாவட்டங்களில் (தூத்துக்குடி, நெல்லை, தென்காசி) அமமுகவுக்கு இருந்த கட்டமைப்பில் மாணிக்கராஜாவின் விலகல் ஒரு பெரிய ஓட்டையை ஏற்படுத்தியுள்ளது.

நேற்று ஓபிஎஸ் அணியின் தூண் போன்ற வைத்திலிங்கம் திமுகவில் இணைந்த நிலையில், இன்று மாணிக்கராஜா இணைந்திருப்பது அதிமுக மற்றும் அமமுக தொண்டர்களிடையே ஒருவித சலசலப்பை ஏற்படுத்தியுள்ளது.

தேர்தல் நெருங்கும் போது எதிர்க்கட்சிகளின் முக்கிய முகங்களை இழுப்பதன் மூலம், களத்தில் ஒரு வலுவான மனநிலையை திமுக உருவாக்கி வருவதாக அரசியல் விமர்சகர்கள் கருதுகின்றனர்.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now