திண்டுக்கல்லில் 8 பேர் அதிரடி கைது...! ரூ. 1,10,000 ரொக்கம் பறிமுதல்...!

by Vignesh Perumal on | 2026-07-23 11:02 AM

Share:

திண்டுக்கல்லில் 8 பேர் அதிரடி கைது...! ரூ. 1,10,000 ரொக்கம் பறிமுதல்...!

திண்டுக்கல் அருகே ரகசிய இடத்தில் பணம் வைத்துப் பணப் பந்தயத்துடன் சூதாட்டத்தில் ஈடுபட்ட 8 பேரை மாவட்டக் காவல் கண்காணிப்பாளரின் தனிப்படை போலீசார் அதிரடியாகக் கைது செய்துள்ளனர். அவர்களிடம் இருந்து ரூ. 1.10 லட்சம் ரொக்கப் பணம் பறிமுதல் செய்யப்பட்டுள்ளது.

திண்டுக்கல் மாவட்டத்தின் பல்வேறு பகுதிகளில் சட்டவிரோதமாகப் பணம் வைத்துச் சூதாட்டம் நடைபெறுவதைத் தடுக்கும் வகையில் தீவிர கண்காணிப்பு நடவடிக்கைகள் எடுக்கப்பட்டு வருகின்றன.

இந்நிலையில், திண்டுக்கல் அருகே உள்ள சீலப்பாடி பகுதியில் வீடொன்றில் பெரிய அளவில் பணம் வைத்துப் பணப் பந்தயச் சூதாட்டம் நடப்பதாக மாவட்டக் காவல் கண்காணிப்பாளர் (S.P.) ஜெயக்குமார் அவர்களுக்கு ரகசியத் தகவல் கிடைத்தது.

அவரது உத்தரவின் பேரில், எஸ்.பி. தனிப்படை போலீசார் சீலப்பாடி சுற்றுவட்டாரப் பகுதிகளில் தீவிரக் கண்காணிப்பு மற்றும் கள ஆய்வில் ஈடுபட்டனர்.

தனிப்படை போலீசார் நடத்திய ரகசிய சோதனையின் போது, சீலப்பாடி, K.R. நகர் அருகே உள்ள பூங்கோடை பகுதியில் சங்கர் என்பவரது வீட்டில் சட்டவிரோதமாகப் பணம் வைத்துச் சூதாட்டம் நடந்து கொண்டிருந்தது கண்டுபிடிக்கப்பட்டது.

அங்குச் சூதாட்டத்தில் ஈடுபட்டுக் கொண்டிருந்த 8 பேரை போலீசார் உடனடியாகச் சுற்றி வளைத்துப் பிடித்தனர். மேலும், சங்கர் (43) (வீட்டின் உரிமையாளர்), பாண்டியராஜன் (50), கார்த்திக் (34), மதுரைவீரன் (36), சரவணகுமார் (27), முரளி (35), லிங்கராஜ் (37), சேசுராஜ் (50) ஆகியோர் கைதுசெய்யப்பட்டு உள்ளது குறிப்பிடத்தக்கது. பிடிபட்ட 8 பேரிடமிருந்தும் சூதாட்டத்திற்குப் பயன்படுத்தப்பட்ட ரூ. 1,10,000 ரொக்கப் பணம் மற்றும் சூதாட்டப் பொருட்கள் பறிமுதல் செய்யப்பட்டன.

கைது செய்யப்பட்ட 8 நபர்களும், பறிமுதல் செய்யப்பட்ட ரூ. 1.10 லட்சம் ரொக்கப் பணமும் மேலதிக சட்ட நடவடிக்கைகளுக்காகத் திண்டுக்கல் தாலுகா காவல் நிலையத்தில் ஒப்படைக்கப்பட்டன.

இச்சம்பவம் குறித்துத் திண்டுக்கல் தாலுகா காவல் நிலைய ஆய்வாளர் உலகநாதன் தலைமையிலான போலீசார் வழக்குப்பதிவு செய்து விசாரணை மேற்கொண்டு வருகின்றனர்.

இங்குத் தொடர்ந்து சூதாட்டம் நடைபெற்று வந்ததா, இதில் வேறு நபர்களுக்கும் தொடர்பு உள்ளதா என்ற கோணத்தில் விசாரணை முடுக்கிவிடப்பட்டுள்ளது. மேலும், மாவட்டத்தில் இதுபோன்று சட்டவிரோதச் செயல்களில் ஈடுபடுபவர்கள் மீது கடுமையான நடவடிக்கை எடுக்கப்படும் என மாவட்டக் காவல் துறை எச்சரித்துள்ளது.

நிர்வாக ஆசிரியர் - பா.விக்னேஷ்பெருமாள்

WhatsApp Group Join Now