திருச்செந்தூர் முருகன் கோயிலில் மூத்த குடிமக்களுக்காக இருக்கை வசதி...! பக்தர்கள் வரவேற்பு...!

by Vignesh Perumal on | 2025-04-25 12:29 PM

Share:

திருச்செந்தூர் முருகன் கோயிலில் மூத்த குடிமக்களுக்காக இருக்கை வசதி...! பக்தர்கள் வரவேற்பு...!

தூத்துக்குடி மாவட்டம் திருச்செந்தூர் அருள்மிகு சுப்பிரமணிய சுவாமி திருக்கோயிலில் 60 வயதுக்கு மேற்பட்ட மூத்த குடிமக்களுக்காக ஏற்படுத்தப்பட்டுள்ள சிறப்பு தரிசன வரிசையில் இருக்கை வசதி பக்தர்களிடையே பெரும் வரவேற்பைப் பெற்றுள்ளது.

முருகப்பெருமானின் அறுபடை வீடுகளில் இரண்டாம் படை வீடான திருச்செந்தூர் கோயிலுக்கு நாள்தோறும் ஆயிரக்கணக்கான பக்தர்கள் வருகை தருகின்றனர். இதில் வயதானவர்களும், உடல்நலம் குன்றியவர்களும் நீண்ட நேரம் காத்திருந்து சுவாமி தரிசனம் செய்ய சிரமப்பட்டு வந்தனர். இதனை கருத்தில் கொண்டு, கோயில் நிர்வாகம் 60 வயதுக்கு மேற்பட்டோருக்கான சிறப்பு தரிசன வரிசையை அமைத்தது.

தற்போது, இந்த சிறப்பு தரிசன வரிசையில் காத்திருக்கும் மூத்த குடிமக்களின் வசதிக்காக கோயில் நிர்வாகம் இருக்கைகளை அமைத்துள்ளது. இதனால் நீண்ட நேரம் நிற்க முடியாமல் அவதிப்பட்ட வயதான பக்தர்கள் மிகுந்த மகிழ்ச்சி அடைந்துள்ளனர். சுவாமி தரிசனத்திற்காக காத்திருக்கும் நேரத்தில் அமர்ந்து ஓய்வெடுக்க இந்த இருக்கை வசதி மிகவும் பயனுள்ளதாக இருப்பதாக அவர்கள் தெரிவித்துள்ளனர்.

மூத்த குடிமக்களுக்காக கோயில் நிர்வாகம் மேற்கொண்டுள்ள இந்த நடவடிக்கை பக்தர்கள் மத்தியில் பெரும் வரவேற்பை பெற்றுள்ளது. தொலைதூரத்தில் இருந்து வரும் வயதான பக்தர்கள் சிரமமின்றி தரிசனம் செய்ய இது வழிவகுக்கும் என்று பக்தர்கள் பாராட்டு தெரிவித்துள்ளனர். கோயில் நிர்வாகத்தின் இந்த மனிதநேயமிக்க செயல் மற்ற கோயில்களுக்கும் முன்மாதிரியாக திகழ்கிறது என்று பலரும் கருத்து தெரிவித்து வருகின்றனர்.

கோயில் நிர்வாகம் தொடர்ந்து பக்தர்களின் வசதிக்காக பல்வேறு மேம்பாட்டு பணிகளை மேற்கொண்டு வருவது குறிப்பிடத்தக்கது. குறிப்பாக, மூத்த குடிமக்கள் மற்றும் மாற்றுத்திறனாளிகளுக்காக ஏற்படுத்தப்படும் சிறப்பு வசதிகள் பக்தர்கள் மத்தியில் நல்ல வரவேற்பை பெற்று வருகின்றன.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now